كيف تقاومين تيار خلع الحجاب؟

فيه شبهة منتشرة بتحصل لبنات كتير تتسبب انهم يخلعوا الحجاب أو النقاب .. تلاقي نفسها تحدثها انها عادية وليست جميلة جمالاً ملفتاً فما الحاجة للنقاب مثلاً وتبدأ وسوسة الشيطان انك هكذا فتنة أكبر للرجال .. انما لو خلعت نقابك فلن تكوني فتنة فإذا استجابت تبدأ في التنازلات بالتدريج حتى تكاد لا تعرفها بعد ذلك
نفس الشيء للبنت المحجبة .. وسوسة متواصلة توصفها البنت بفكرة ملحة مسيطرة عليها انها بالحجاب شكلها أجمل وده معناه انها مش محققة شروط الحجاب وتبدأ فكرة خلع الحجاب تكبر وبرضه بعد ما تخلعه تبدأ في تنازلات لم تكن تتخيلها وتتناسب تلك الشبهة طردياً وتزداد عنفاً إذا صادفت شهوة حب الظهور أو لفت الأنظار في نفس المسلمة أو إذا كانت البيئة المحيطة بها مشجعة على التبرج أو كانت تتعرض لاضطهاد بسبب الحجاب أو النقاب

طيب ايه علاج الأمر ده ؟ ببساطة قانون نيوتن التالت بيقول لكل فعل رد فعل مساوٍ له في القوة ومضاد له في الاتجاه .. عايزة تقاومي تيار خلع الحجاب أو النقاب ابذلي مجهود في الاتجاه العكسي .. يعني حسنِّي من حجابك أكتر .. طولي الطرحة ..وسعي اللبس... ركزي ان نقابك يكون ساتر أكتر .. زودي من الطاعات بشكل عام .. والقرآن والاستغفار والدعاء وقيام الليل بشكل خاص.. فوضي أمرك لله واعتصمي به ولا تتحدثي في هذا الأمر مع بشر .. فقط كوني مع الله وتأكدي ان ربنا هيتولاكِ برحمته وياخد بإيدك والوساوس سوف تذهب إلى الجحيم
هذا ابتلاء للتمحيص واختبار للثبات .. فلنثبت ونرِ الله من أنفسنا خيراً
#الحجاب
#النقاب
#اللهم_ثبت_المؤمنات

من واقع الاستشارات_2

بعد ما فهمتي نفسك وعملتي الواجب وحددتي أولوياتك في الزواج
جه عريس ومطلوب تقعدي معاه قعدة التعارف .. ايه المطلوب منك بقى؟
رقم 1 و2 و3 و 10 حاولي تكوني نفسك .. خليكي على طبيعتك .. نفس لبسك اليومي العادي البسيه (المفترض انك مهتمة بنفسك وشيك في حياتك عموماً ).. ماتغيريش طريقة كلامك ولا تحاولي تكوني حد تاني غير نفسك
لو مش بتحطي ميكاب يبقى في اليوم ده برضه ماتحطيش ميكاب وأصلاً الميكاب حرام على فكرة
خليكي واثقة في نفسك وحبيها زي ما هي .. اتكلمي وعبري عن نفسك .. كلمي العريس نفسه ببساطة وكلمي أهله عادي زي أي ضيوف جايين البيت ..
لما تقعدوا تتكلموا .. افتحي مواضيع تخليكي تقدري توصلي لإجابات الأسئلة دي:
1- هل انتي متقبلة تعيشي مع الشخص ده بقية حياتك ويبقى نصفك الآخر؟ (مش بس شكل .. الشكل بتتعودي عليه .. انما الجوهر أهم والعادات كمان ومنها اللبس المهندم والنظافة والابتسامة)
2- هل فيه توافق فكري بينكم ولا فكركم بعيد عن بعض؟
3- بعيداً عن الزواج والمشاعر .. هل ممكن تكونوا أصدقاء ؟ (غالباً أكتر زوجين ناجحين اللي قدروا يكونوا اصدقاء مش اللي بيحبوا بعض
 4- ايه أهم ميزاته وايه أصعب عيوبه؟ (دي محتاجة منك ملاحظة دقيقة وأكتر من قعدة )
5- هل أهدافكم في الحياة متقاربة ؟
6- هل بيقدر المرأة ولا لأ ؟ (دي تعرفيها من معاملته لوالدته ولأخواته البنات وكلامه عنهم .. لو ما تكلمش عنهم .. انتي افتحي كلام عنهم ولاحظي مفرداته وتعبيراته)
لا تنخدعي بالكلام وبس .. ادرسي لغة الجسد وافهمي ما وراء الكلام .. هاتقدري تميزي اللي بيكذب واللي طبعه متكبر واللي بيظهر غير ما يبطن .. يعني هاتفهمي كتييييييييييييييييييييير قوي عن الشخص المتقدم ليكي .. الكلام بيعرفك 20 % بس من الحقيقة و80 % من لغة الجسد وتعبيرات الوجه ونظرة العين وحركات اليدين وطريقة الجلوس
مين العشر شخصيات اللي يترفضوا من أول قعدة:
1- اللي عينه زايغة ونظرته تجرحك
2- قليل الذوق معاكي أو مع أهلك أو مع أهله
3- اللي ماهتمش يلبس حاجة نظيفة ومقبولة وهو جاي يتجوز
4- اللي بيتشرط من اول قعدة
5- اللي يقولك أن باقطع في الصلاة وخدي بايدي وساعديني وشجعيني .. للأسف غالباً يبقى مش بيصلي ولو حبيتي تشجعيه بعد كده هيقولك دي حاجة بيني وبين ربنا
6- اللي ساكت مابيتكلمش خالص واهله متوليين الموضوع (احتمال كبير يبقى ابن أمه ومالوش شخصية)
7- اللي بيتكلم في الماديات بس ودي أهم نقطة عنده
8- اللي يتكلم وحش عن واحدة كان خاطبها قبلك (عديم المروءة)
9- المتدين اللي مالوش رأي وباع فكره لمشايخ أو أحزاب أو جماعات وهو بيردد كلامهم بس (طبعاً السنين اللي فاتت أثبتت ان ماحدش ثابت على حال وكلنا معرضين للفتنة )
10- اللي فيه عيب لا تستطيعي تحمله .. ماتخدعيش نفسك وتقولي أنا هاغيره .. لا .. لو التغيير مش نابع داخلياً من جواه مش هيتغير أبداً
آخر حاجة قعدة تعارف واحدة مش كفاية .. لازم أكتر من مرة ويفضل يكونوا في أماكن مختلفة في بيتك .. في بيت الوسيط .. في النادي .. في كافيه .. عشان تلاحظي تعاملاته مع ناس مختلفين خاصة الناس اللي زي عامل الكافيه أو الجرسون أو البياع .. هتبين لك هو مغرور ولا لأ .. وكمان القعدات في أماكن بره تبين هو كريم ولا بخيل .. عينه زايغة ولا بيغض بصره ؟)
صلاة الاستخارة رفيقك الدائم في الفترة دي والدعاء للعلي القدير يرشدك لما فيه الخير ويمنع عنك الألم ويجعلك من عبيد إحسانه
ربنا يرزق بنات المسلمين الأزواج الصالحين ويصلح بيهم حال الأمة
#وعي_ذاتي
#قبل_الزواج

عن الخطوبة

يا بنات.. لما يجيلك عريس ويكلمك وترتاحيله واستخرت ربنا ووافقت "مبدئياً" .. لازم الأمور تقف لحد كده وينتقل كلامه مع الأهل مش معاكي .. خلاص .. ماينفعش مكالمات ومسجات وواتسابات .. الموضوع يبقى بين الأهل .. كده أسلم من كافة النواحي:
1- شرعاً هو أجنبي عنك وماينفعش الكلام ده بينكم ولا بحجة نعرف بعض .. اتفضل في البيت واتقدم واعرفني في وسط أهلي وأنا كمان أعرفك
2- عرفاً أهله مش هيعجبهم انه بيكلمك عادي كده وهيحسوا ان الأمور فيها تساهل
3- هو مش هيحس انك غالية وبعييييييييييييييدة ومحتاج يتعب عشان يوصلك .. انتي معلش خليتي نفسك على مسافة كبسة زر منه
4- انتي هتتعلقي بيه ولو لا قدر الله ماحصلش نصيب قلبك هينجرح .. خللي بالك على قلبك قوي
5- الكلام الكتير في التليفونات والرسايل بيجيب خناقات .. آه والله العظيم خناقات جامدة كمان وتتفسخ الخطوبة قبل ما تتم أو تتفركش قبل اتمام الزواج

هاتسأليني طيب أعرفه ازاي؟!!!!!!!!
هاقولك كتر الكلام مش هيساعدك تعرفيه .. الانسان مش بيتعرف من كلامه لأن الكذب كتير .. اللي هيساعدك تعرفيه حاجتين: قوة ملاحظتك وذكائك في تحليل المواقف
عايزة تعرفي طبيعته لما يجيلك البيت ويقعد معاكي في وسط أهلك وأهله لاحظي هو بيتكلم ازاي أكتر من بيقول ايه .. لاحظي نظرته محترمة ولا ****..
لاحظي طريقته مع أهله هل بيحترمهم .. هل بيحبوه .. هل بيتحكموا فيه ؟!!!! لو خرجتوا لمكان (مع محرم ليكي طبعاً) لاحظي تعامله مع الناس الغلابة (جرسون - بياع ... الخ) هل متكبر ولا انسان بسيط ؟
خليكي قوية الملاحظة بس مش حساسة زيادة عن اللزوم تزعلي من اقل كلمة أو تصرف .. بالعكس خللي زعلك غالي وماتزعليش الا في حاجة كبيرة فعلاً .. لكن كتر الزعل ببساطة هيقول عليكي أماصة ونكدية ويكبر دماغه في كلامه ويبطل يراعي مشاعرك تماماً ..
طيب ذكائك تستخدميه ازاي .. مثلاً لو قالك كلام بايخ (وما أكثره) .. قبل ما تزعلي اسأليه بطريقة هادية جداً مع ابتسامة يا ريت: يا ريت توضح لي انت تقصد ايه من الكلام ده؟ وسيبيه يشرح .. غالباً هيتراجع عن الكلام البايخ .. تروحي قايلة: ده أنا فهمت حاجة تانية في الأول بس قلت مش ممكن يكون قصدك ده .. انت أكيد عارف ان ده كلام يزعل .. انتي كده فهمتيه من غير خناق ولا نكد ان تاخد بالك من كلامك عشان ماتزعلنيش .. بطريقة غير مباشرة وهي ناجحة جداً مع هذا الصنف من البشر
نيجي بقى لتحليل المواقف هيساعدك قوي كتاب الرجال من المريخ والنساء من الزهرة .. ضروروي جداً عشان تفهمي الدماغ الذكورية بتفكر ازاي وهتندهشي جداً على فكرة
مش كل كلمة بايخة تقوليله احنا خلاص كده فركش .. هيحس انك مش باقية عليه وهو اللي هيفركش في وقت لا تتوقعيه
بلاش ننقل لبابا وماما وأختي وخالتو وعمتو كل تفاصيل أمورنا وقاللي ايه وقلت له ايه والعفش منين والشقة بكام ووووووو.. كفاية كلام يا أمي
والخلاصة في رجال هذا الزمان عشان ماتتعبيش وتنتظري سراب:
الأغلبية إلا من رحم ربي تافهين وسطحيين وعصبيين ودلوعين ومذبذبين وحريصين جداً مادياً وبيمثلوا الغيرة عشان السيطرة عليكي وفوق ده كله قليلي الذوق في الكلام
الفارس النبيل مش موجود .. خلص من زمان للأسف فتعايشي مع الصنف المتاح
تنويه هام: هذا الكلام لا علاقة له بحياتي الشخصية .. أنا أكتب هنا من خلال خبراتي وملاحظاتي والمشاكل المختلفة التي تعرض علي
#انتي_واعية
#انتي_غالية

بنيتي ..افهمي نفسك أولاً

#من_واقع_الاستشارات
بنات كتير بتسأل ازاي أعرف الشخص اللي متقدملي .. ازاي أميز هو انسان يناسبني ولا لأ .. ازاي أعرف طباعه وأخلاقه .. الحقيقة الموضوع ده يمثل ضغط كبير على البنت في المرحلة الحرجة دي .. هي على شفا انها تختار انسان يشاركها حياتها ويكون له تأثير كبير على مستقبلها .. يكون أب لولادها .. ورفيق عمرها وابن تاني لأهلها .. لازم تتأكد أنه هيكون مناسب وهي لسه على البر قبل ما تتدبس
نجاحك في فهم الشخص المتقدم ليكي من أول مقابلة بنسبة كبيرة يعتمد على فهمك لنفسك أولاً .. يعني وعيك الذاتي .. ميزاتك .. عيوبك .. نقاط قوتك .. نقاط ضعفك ..قيمك ومبادئك ..أهدافك في الحياة عموماً .. وهدفك من الزواج بالأخص.. أحلامك ورؤيتك لبكرة .. أولوياتك .. ايه اللي ممكن "تتغاضي" عنه في العيوب .. وايه اللي ماتقدريش تتعايشي معاه ؟

اكتبي الأسئلة دي في ورقة واعتبريها دليلك لمعرفة نفسك .. تأمليها وافتكري نفسك من كام سنة .. اسألي نفسك تاني .. هل اتغيرت ؟ ايه اللي تغير في أفكاري وطباعي وأحلامي ؟ اطلعي بنتيجة -----------> اننا بشر مش شجر .. مش ثابتين على حال ..احنا ممكن نتغير ولكن التغيير غالباً ناتج من داخلنا .. أي تغيير خارجي غالباً يقابل بمقاومة زي ما قال نيوتن كل فعل له رد فعل مساو في المقدار ومضاد في الاتجاه
حوارك الذاتي ده هيساعدك توقفي "حكم" على الناس وتبدأي مرحلة جديدة من "تفهم" الآخرين وتقبلهم وعدم محاولة تغييرهم ..
ده يفيدك في ايه في المرحلة المهمة اللي انتي مقدمة عليها .. هقولك ان شاء الله بس لما تنفذي الواجب اللي في المشاركة دي الأول ..
#وعي_ذاتي
#قبل_الزواج