اقرار المشاعر

هيحصلك ايه لو احتويت اللي جاي يشكيلك وماحسستوش ان مشكلته تافهة وان فيه ناس عندها مصايب أكبر .. أو ان الدنيا مش دايماً على وتيرة واحدة وكأنه كان عايش في جنة وبيشتكي من شكة دبوس !!! .. أكتر تكنيك بيعجبني في التربية الإيجابية هو validate feelings أو اقرار المشاعر .. يعني ببساطة تقدير مشاعر الطفل لما يكون متعصب أو حزين أو غضبان أو محبط أو أو .. دي الخطوة الأولى اللي هتساعده يتخطى المشكلة وفي نفس الوقت هتخلق بينكم رابطة قوية جداً وصداقة تدوم العمر
نفس التكنيك ده احنا محتاجين نستخدمه مع كل اللي حوالينا وخاصة أصحابنا .. بلاش تتسبب في كسرة نفس حد .. بلاش تحسس حد بالذنب انه حكى لك على مشكلته أو تحسسه بالذنب انه مضايق أصلاً.. بلاش تحكم على الناس من وجهة نظرك وبناء على خبراتك وشخصيتك وطباعك .. حاول تحط نفسك مكان اللي بيكلمك وتحس بيه وبانفعاله "هو" مع مشكلته .. حاول تشوف الصورة كاملة مش بس الجزء البسيط اللي ظاهر لك من كلامه .. لو ماتقدرش تعمل كده يبقى بلاش تسأل صاحبك .. مالك متغير ليه ؟ أو تطلب منه يفضفض معاك وانت مخبي دش مياه ساقع ورا ضهرك وجاهز انك ترميه على المسكين اللي صدقك وفضفض لك باللي في نفسه
لو نفسك تساعد يبقى اقرأ واتعلم ازاي تساعد من غير ما تأذي لان فعلاً فيه ناس ممكن قلوبها تنكسر بسبب كلمة قلتها أو احساس وصلته وانت فاكر انك بتساعدهم

#Coaching
#ValidateFeelings
#BeEmpathetic

كن نفسك

أنت لا تساوي درجتك في الامتحان ..
قد تكون طالباً متميزاً وخانك الوقت لكنك تعلم حل ما فاتك .. فلا تبتئس لضياع الدرجة ولا تجلد نفسك وتلومها ولكن "تعلم" أن تتدرب أكثر حتى لا يخونك الوقت ولا تحزن فأنت لا زلت متميزاً (y)
قد تكون طالباً متوسطاً في هذا العلم لكنك متميز جداً في علم آخر فلا تحبط وتقول لا توجد فائدة .. فقط هذا الفرع من العلم يحتاج منك مجهوداً إضافياَ أو طريقة مختلفة للمذاكرة تتناسب مع نمطك التعلمي وذكاءاتك .. كن إيجابياً ولا تحزن فأنت لا زلت متميزاً (y)
قد تصنفك الدرجة في خانة الراسبين لكنك متميز جداً في الفن أو الرياضة أو البرمجة أو التصوير أو الديزاين أو soft skills أو غيرها من المهارات التي لا تقيمها الدرجات .. اجتهد واعمل على تقوية نفسك بالتعلم الذاتي .. استخدم طرق تعلم مناسبة .. قيم مواطن الخلل وعالجها .. لا تيأس واستعن بالله ولا تعجز .. ولا تحزن فأنت لا زلت متميزاً (y)
كل منا له ما يجعله مختلفاً عن الآخرين فلا تختزل نفسك أبداً في درجة امتحان :)

#كن_أنت
#لا_تحزن

أنت تقدر

أكتر جملة منتشرة في مصر والدول العربية وتمثل خلل تربوي حقيقي يؤدي لمشاكل في شخصية الانسان على مدار عمره هي جملة " ده عيل مش بيفهم لسه " سمعتها بكل اللهجات العربية تقريباً
نتيجتها شفتها بعيني لما الطفل اللي تعرض للكلمة دي بشكل مكثف من المربين والأهل والمعلمين يكبر ويدخل الجامعة:
طالب في اعدادي هندسة يعني عنده حوالي 17 أو 18 سنة يقوللي "مش عارف أعمل ايه " أو "مش فاهم" من غير ما يحدد مش فاهم ايه بالظبط ومن غير ما يحاول يفهم نفسه أو يبذل أي مجهود لإجابة سؤاله اللي عادة بتكون إجابته قدام عينيه بس هو للأسف مادورش على إجابة أصلاً لأنه تعود انه دايماً يلجأ لحد أكبر أو خبرة عنه يقصر عليه طريق التعلم
طالبة في اعدادي هندسة تقوللي من بين دموعها "مش قادرة أرسم" .. هي ماحاولتش .. هي خايفة تحاول .. الرسم الهندسي جديد عليها .. وهي تعودت دايماً ان فيه حد هياخد بايدها أو يعمل عنها كل حاجة صعبة .. هي مش عندها ثقة بنفسها انها تبدأ لوحدها .. ماعندهاش استعداد تحاول وتغلط وتتعلم من غلطها وتصححه .. ماتعودتش على الاستكشاف ولا محاولة تعلم الجديد بنفسها

كل ده يمكن حله من جذوره بإننا نتعامل مع الطفل انه "بيفهم" وقدراته غير محدودة .. ويمكن يستوعب معلومات أكبر بكتير من تخيلنا .. بلاش نفترض ان فيه حاجة صعبة عليه .. ان كنت مربي او معلم استخدم مع طلابك دايماً كلمات إيجابية وأهمها "انت تقدر"
عشان كده بقول لولادي في اعدادي هندسة أثناء سكاشن الرسم الهندسي ممنوع تقول 3 كلمات : مش قادر .. مش عارف .. مش فاهم
3 كلمات بس نتيجتهم رسائل سلبية تؤثر سلباً على شخصيتك ورحلتك مع التعلم وعلى مستقبلك ..
يا ريت نلغي الكلمات دي من حياتنا وحياة ولادنا وحياة طلابنا
#انت_تقدر
#حاول_عافر

التسامح أفضل من البتر

تزعجني كثيراً النصائح المنتشرة على فيسبوك ومحورها كالآتي:
اطرد من حياتك الأشخاص السلبيين .. مصاصي الطاقة
اللي مش مقدرك خرجه من حياته
اللي مش مرتاح معاه ارميه بعرض ايدك
وكمان اللي بنشوفه لو حد طلب نصيحة في التعامل مع الزوج/الزوجة أو في فترة الخطوبة وتلاقي الناس هجوووووووووووم .. مافيش حل إلا الطلاق .. البتر .. ماتكمليش معاه .. الحق نفسك
أظن ان الأسلوب ده يصدر من نوعين من الناس إما الشباب والبنات الصغيرين قوي اللي لسه خبرتهم قليلة وماقابلوش إلا اصحاب المدرسة أو الجامعة والنادي والجيران .. يا إما ناس من النوع الذاتي قوي.. introverts قافلين على نفسهم وعندهم صعوبات في التعامل مع الناس
الواقع بيقول ان الدنيا واسعة قوي والناس متنوعة فيهم اللي هنتفق معاهم وفيهم اللي مستحيل نتفق معاهم .. لكن برضه فيهم اللي نقدر نتعامل معاه رغم الاختلاف .. لو بس اتعلمنا نتقبل اختلاف الآخرين واتعلمنا كمان اننا ناخد من الناس الحلو اللي فيهم ومانقربش قوي من الجزء اللي ممكن يوجعنا ويسبب الخلافات
يعني مثلاً حد سلبي جداً هل الصح ان كل الناس تقاطعه .. طيب افرض انت كنت كده .. هتفرح ان مافيش حد متقبلك ؟!! بلاش .. افرض حد مختلف معاك جداً بس انت مجبر تتعامل معاه وماتقدرش تطرده من حياتك وماتقدرش تغيره .. هتعمل ايه ساعتها ؟ مافيش غير حل واحد:
نحاول نتقبل بعض وصدرنا يتسع للمختلفين عننا .. مش ممكن هنقدر نحيط نفسنا باللي زينا بس ..ده أمر غير واقعي وغير عملي .. وبعدين ده الحقيقة كمان يبقى شيء ممل جداً .. لازم يكون فيه في محيطك ناس مختلفة عنك .. انت أول واحد مستفيد من التنوع ده ..

ده غير ان اللي انت شايفه متفق معاك النهاردة ... مع مرور الزمن الدنيا هتغيره .. أو هتغيرك .. اتفقنا اننا مش شجر .. احنا بشر بنتغير .. آه فيه طباع ثابتة .. لكن فيه قناعات كتير بتتغير مع السن وكمان فيه طباع يمكن تهذيبها مع تقدم العمر .. أنا مثلاً لو كنتم شفتوني وأنا في سن بناتي في الجامعة هيصعب عليكم ايجاد نقاط مشتركة بين هبة زمان وهبة دلوقتي .. هتنبهروا الحقيقة .. اتغيرت كتيييير وده مش عيب طالما بحاول أتعلم وأستفيد من تجاربي وتجارب اللي حواليا كمان ..وتغييري ده كان كويس في نظر ناس ووحش جداً في نظر ناس تانية .. لكن مش مهم قوي الحقيقة رأي الناس .. المهم اني أتبع حدسي وشغفي وأحقق أهدافي.. المهم اني أحس بالتصالح مع نفسي وأحبها أياً كانت
يبقى الconclusion : بلاش تعميم وبلاش بتر .. وبلاش black & white thinking .. نخللي رؤيتنا أوسع شوية ونتقبل اختلاف الآخرين عشان نقدر نتعايش في سلام وماننساش ان ده بيحافظ على قلوبنا رحيمة ونقية .. كثرة القطيعة توغر الصدور وتثير الأحقاد وتكسب القلب قسوة نحن في غنى عنها .. ربنا يرزقنا وإياكم قلباً سليماً
تسامحوا وصفوا نفوسكم.. احنا في شهر شعبان .. ربنا يصلح حالنا جميعاً ويبلغنا رمضان ويبارك لنا فيه

رفقاً بمريض الاكتئاب

من أهم علامات الاكتئاب الملحوظة للأهل ان الشخص المكتئب يبقى مش عارف ينام بالليل (أرق شديد) + مش عايز يصحى الصبح أصلاً .. مش عايز يبدأ يومه من الأساس.. لو لاحظت العرض ده على حد بتحبه ماتسيبوش .. قرب واحتوي .. اسمع وتعاطف .. المحظورات ايه بقى:
بلاش نصايح ..
لو بدأ يتكلم ويخرج اللي جواه بلاش انتقاد ..
بلاش كلمة ما انت اللي غلطان ..
بلاش كلمة خللي عندك ايمان بالله ..
بلاش الكلمة الخنيقة للغاية بص حواليك فيه ناس عندها مصايب أكبر
أو الدنيا مش بتمشي على وتيرة واحدة لازم تحس بالابتلاء شوية ..
بلاش تحسسه بالذنب انه حكى لك .. والله هيسكت خالص ولو سكت حالته هتزيد .. وتبقى بدل ما كسبت ثواب انك أغثت ملهوف وأدخلت على قلبه السرور وأنقذته من السقوط في المرض أكثر.. لا هاتبقى وقعته اكتر ووجعته جداً
#الاكتئاب_مرض
#رفقاً

ازاي تنجز الكورسات الأونلاين؟

زي ما اتفقنا احنا في عصر ال Moocs = Massive Open Online Courses .. تلاقي كورس اتفتح على أي موقع كورسات زي كورسيرا ، Edx ، Alison أو المنصات العربية زي رواق وإدراك .. تلاقي هجوم ناس كتير بتسجل انضمام لكن قليل قوي اللي بيواظب ويكمل .. الحقيقة ان أكبر عائق قدامنا لاستكمال الكورسات الأونلاين خاصة اللي تعتمد على فيديوهات بتشوفها on your pace هو عدم تنظيم الوقت وصديقه الصدوق التسويف.. الكورس لسه نهايته بعيييييد وانت مطمن وطبعاً بتشتغل في كل حاجة مستعجلة عندك والكورس ده مركون في أعمق أعماق جدولك اليومي ..

الحل: جدول يومي مخصوص للكورسات اللي انت مشترك فيها .. جدول زي جدول حصص المدرسة زمان يعني باليوم والساعة وتعلقه قدامك.. كمان حدد لنفسك حد أقصى لعدد الكورسات اللي تاخدها في نفس الوقت حسب وقتك والمهام اللي عليك ..وممنوع تلتحق بكورس جديد وانت لسه ماخلصتش القديم .. أيوه اتعذب وانت بتشوف كورس لقطة ورائع وجميل وماتشتركش فيه عقاباً لنفسك كثيرة التسويف اللي مش بتبطل تأجيل
حط جدول منطقي ومرن ومناسب لباقي المهام اللي عندك .. طبيعي انت طالب أو متخرج وبتشتغل .. ممكن تبقي زوجة وام وبتشتغلي .. يعني نوازن وبلاش جدول غير واقعي يؤدي لعدم التنفيذ
تابع نفسك وشوف ايه اللي بيعطلك .. اكيد أكيد هيطلع الفيسبوك أو الواتساب .. فتحت اللاب وجهزت النوتة والقلم والسماعات وهاتسمع الفيديو .. قامت نفسك المسوفة (بتشديد الواو) قالت لك تعالى نبص بصة على الفيس ولا على جروب الواتس .. يمكن حد باعتلك رسالة مهمة بس خلااااااص كده .. راح التارجت ومش هتسمع المحاضرة
يبقى لازم ايه بقى تعاقب نفسك لو مانفذتش الهدف اليومي.. الجزاء من جنس العمل .. شوف ايه اللي عطلك واحرم نفسك منه يومين وانجز في اليومين دول
افتكر ان التأجيل هيوصلك انك ماتقدرش تتابع الكورس ولا تستفيد منه وتتراكم عليك المحاضرات لغاية ما تبقى كمية مستحيل تنجزها في الوقت البسيط اللي قبل course deadline
الكلام ده لنفسي أولاً .. ربنا يهديني وأخلص الفيديوهات المتكومة عليا في يجي 3 كورسات بالإضافة للشغل الذي لا يرحم والأولاد والبيت
#Moocs
#اتعلم_من_بيتك
#انجز

كلمة لطلبة ثانوية عامة بعد النتيجة

بوستات كتير جداً لطلبة ثانوية عامة جابوا مجموع أقل من اللي كانوا بيتمنوه ومصدومين ومتأثرين نفسياً وحاسين بالضياع .. أولاً كلمة ليهم اللي حصل حصل خلاص .. واجه الموقف بأخف الأضرار.. اختار الأقرب إلى ميولك وان شاء الله تنجح وتتفوق فيه يعني كان نفسك في طب ومجموعك جاب علاج طبيعي حلو قريبين .. كان نفسك في ألسن ومجموعك جاب آداب مافيش مشكلة .. نفترض أصعب حالة كان نفسك في هندسة كمبيوتر جبت مجموع يدخلك معهد خلاص اختار الأقرب لميولك يعني معهد حاسب آلي مثلاً
ده الحل الأمثل .. طيب دخلت كلية ومش مرتاح فيها .. مش مشكلة .. خدها شهادة .. واتبع شغفك وادرس اللي بتحبه أونلاين واشتغل فيه من بدري واكسب وابني اسمك وخبرتك من وانت طالب وماتضيعش عمرك

ثانياً كلمة للطلبة اللي رايحين ثانوية عامة افهم نفسك واعرف ميولك مش بس من المواد اللي بتحبها .. لأ كمان من اهتماماتك في الحياة .. اللي بتحب تعمله في وقت فراغك .. هواياتك .. واختار الكلية على هذا الأساس .. يعني اتبع شغفك برضه وتأكد انك هتتألق في المجال ده وهاتنجح وتتميز فيه
طبعاً في مرحلة التفكير يفضل ان يكون فيه أكتر من مجال لاهتماماتك أو بمعنى آخر عدة خطط .. افرض تعبت قبل امتحان معين أو حصل ظرف في مادة معينة خسفتلك بالمجموع الأرض أو التنسيق اترفع .. عشان ماتحبطش يكون عندك Plan B و Plan C كمان تحسباً للظروف
أنا مثلاً كنت مقررة الكليات بالتدرج الآتي طب - صيدلة - هندسة - إعلام - آثار- حقوق
وكلهم -على اختلافهم- باحبهم ومن اهتماماتي بس لازم نفترض أسوأ الظروف ونبقى جاهزين ومفكرين مسبقاً بدل ما نفاجأ ونتوتر ونقلق والأدرينالين يعلى مانعرفش نفكر ويركبنا المرض بدري بدري
ملحوظة: طريقة التفكير دي تسري على اختيار الأقسام في الكليات كمان .. ماتعلقش حلمك بقسم معين لو ماجاش تحبط .. خليك مرن .............وتصبحوا على تحقيق أحلامكم
#اتبع_شغفك
#رتب_خططك

المساندة مقابل النصح المباشر

كنت دايماً أقول بلاش نحكم على حد .. اتعلمت شوية زيادة ولقيت ان بلاش كمان ننصح حد من غير ما يطلب مننا النصيحة .. بلاش نحاول نغير حد هو مش عايز يتغير .. ده مش دورنا تجاه بعض كبشر ولو لاحظنا هنلاقي ان كل المحاولات من النوع ده دائماً تذهب سدى والنتيجة صفر
اللي عايز يتغير هو هيحاول يتغير هتلاقيه هو اللي بيسأل وبيقرأ ويبحث ويعافر لغاية ما يحقق التغيير اللي هو "محتاجه"
اللي عايز نصيحة هو هيدور عليها وهيسعى انه ينفذها
طيب دورنا ايه تجاه بعضنا ؟ .. لما حد يحتاجنا نحاول نساعده بكل ما نستطيع .. ولو حوالينا حد عزيز علينا ومن وجهة نظرنا محتاج مساعدة أو نصيحة .. بلاش نفرض نفسنا عليه .. بلاش ننصح بشكل مباشر .. ممكن نقدم المساعدة والدعم بشكل غير مباشر .. ممكن نقوله احنا موجودين لو احتجتنا هتلاقينا .. ممكن نحاول نكون قريبين ومستمعين ونقبله كما هو .. لما هيحتاج يتكلم هيدور حواليه وغالباً هيلجأ لينا .. وقتها هيكون مستعد يسمع ومش بس كده يطبق النصيحة اللي قلناها لأنه طلبها بنفسه

لما تعمل كده كمان هاتحس انت شخصياً براحة شديدة لأنك لا تلعب دور الناصح المنقذ .. لأن الدور ده مع الوقت هيتعبك قوي ويضغط على أعصابك بالعديد من المشاعر السلبية.. ممكن تحس ان كلامك ونصحك راح هدر .. ممكن تغضب منه لأنه ضرب بكلامك عرض الحائط ..ممكن تحس بالذنب لأن الشخص اللي نفسك يتغير في الواقع مش بيتغير زي ما انت "عايز" فتبدأ تلوم نفسك وتجلدها لأنك لم تجتهد في النصح أكثر ..والحقيقة أن الأمر لا يعنيك أبداً .. أنت لست منقذاً لأحد .. ولا وصياً على أحد.. "كل نفس بما كسبت رهينة" - "بل الإنسان على نفسه بصيرة" .. الآخر هو شخص عاقل راشد "مثلك".. اعطه الفرصة ولا توفر عليه عناء السعي نحو التغيير.. فقط كن بجواره
واحذر أن هذا الأسلوب مع الوقت قد يصل بك دون قصد إلى تنصيب نفسك حكماً على الناس وهذا يضر عقلك وقلبك معاً .. ترهق عقلك طوال الوقت في التأمل في من حولك و"تقييمهم" واختيار من يحتاج للتغيير أو النصيحة لتبدأ مهمتك المقدسة أو التي تظن أنها مقدسة .. وهي ليست مهمتك من الأساس !!! وفي نفس الوقت يتسلل إلى قلبك حب الظهور والعجب وهما من أشد أمراض القلوب فتكاً ..
وفي خطاب الله للرسول في هذه الآية الكريمة دلالة واضحة:
"فإن أعرضوا فما أرسلناك عليهم حفيظاً إن عليك إلا البلاغ"
الرسول صلى الله عليه وسلم دوره التبليغ وتوصيل الرسالة أما الهداية فليست دوره وإنما هي منحة من الله يهدي من يشاء ويضل من يشاء .. هذا في توصيل رسالة الإسلام .. فما بالك بما هو أدنى .. فما بالكم بنا نحن ... بشر عاديون.. لنا ما لنا وعلينا ما علينا
**أكتب هذا من باب عرض الرأي وليس النصح
#استمع_ادعم_ساند_تقبل
#بلاش_تلعب_دور_المنقذ

اشتغلوا يا بشمهندسات

نداء إلى باشمهندسات دفعة 2016 .. خلاص الحمد لله خلصت احتفالات التخرج يا حبايبي.. أكتر دفعة احتفلت بالتخرج ما شاء الله .. يللا اشتغلوا بقى ... انتم قاعدين في البيت ليه ؟
الفرصة جات أخيراً انكم تبدأوا حياتكم صغيراتي وتصنعوا بصمتكم وتشاركوا في تغيير العالم .. والعالم يبدأ بكِ حبيبتي .. فإن نجحت في تغيير نفسك للأحسن فهذا إنجاز في حد ذاته وتغيير للعالم بلا شك
اشتغلوا بأسرع ما يمكن قبل الخطوبة والزواج .. قرار العمل لما بيسبق قرار الزواج بيكون أفيد على مستويات كتير .. أولها وأهمها ارتفاع مستوى تفكيرك وحكمك على الأمور وسعة أفقك .. العمل هيساعدك تشوفي ناس عمرك ما قابلت زيهم .. هاتفهمي الدنيا أكتر وبالتبعية آرائك هتتغير وده هيكون ليه تأثير بالغ على تحديدك لمواصفات شريك الحياة المناسب.. هاتبقي أكثر مرونة ... أكثر ثقة .. أكثر قدرة على حل المشكلات وإيجاد الحلول.. أكثر تقديراً لعمل الرجل لأنك عارفة يومه شكله ايه.. أكثر تحملاً للمسئولية ومعرفة أفضل بالأمور المالية .. ده غير الخبرة العملية وده كلام انتم عارفينه كويس .. يعني خبرات كبيرة جداً ماتفرطيش فيها

اشتغلي بسرعة .. عشان لو ماشتغلتيش هتندمي لما تكبري شوية وتلاقي ساعتها صعوبة انك تنزلي تشتغلي بدون خبرة
اللي عايزة تشتغل بالهندسة .. برافو عليكي Go on
واللي مش عايزة أو شايفة صعوبة اشتغلي حاجة بتحبيها .. بس اشتغلي
اللي مش عايزة اختلاط .. اشتغلي من البيت.. المهم تشتغلي
اللي مش عايزة تشتغل عند حد .. شوفي انتي مميزة في ايه وابدأي مشروعك الخاص Be your own boss
المهم تشتغلي وتحسي بالانجاز .. منتظرة أشوف صوركم في المصانع والشركات .. وسط المعدات وفي المواقع.. أو حتى على مكتبك المكيف يا عمارة .. عارفاكم أنا
هافرح بيكي وانتي بتفتحي مشروعك الصغير مهما كان صغير .. هاكون فخورة بيكي لو اتبعت شغفك واخترت العمل في مجال مختلف عن الهندسة .. المهم انك تعملي حاجة بتحبيها
مش عايزة أشوف حد من غير شغل .. حتى لو اخترت البيت اشتغلي برضه من البيت .. أي حاجة ولو بسيطة هاتفرق معاكي جداً حتى ولو عمل تطوعي بدون أجر
عايزين نقول مبروك بقى
الخريجات القدام يا ريت نسمع منكم في التعليقات ازاي أخدتم قرار الشغل .. ايه المصاعب اللي قابلتكم .. وصلتوا لإيه حتى الآن؟ خدوا بإيدين أخواتكم
#اشتغلوا
#انجزوا