من واقع التصحيح_تنظيم الحل

مع كل ورقة باصححها في امتحاناتي من السنة اللي فاتت ولحد الآن لاحظت حاجة متكررة .. الطالب فاهم الأسئلة بس مش عارف يعبر بالإنجليزي أو مش فاهم السؤال لأنه بالإنجليزي وبيجاوب على حاجة تانية مع اني باستخدم انجليزي سهل وامتحاني من كلامي في المحاضرة .. غالباً اللي كاتب بالعربي بيكون كلامه مفهوم وصحيح علمياً ..
طبعاً أنا ماطلبتش منهم يحلوا بالإنجليزي وأي حد بيسألني أحل عربي ولا إنجليزي .. باقوله حل بأي لغة المهم تبين انك فاهم وبلاش رغي كتير وافتكاسات.. لكن فعلاً باشوف في الورق مهازل يندى لها الجبين ... جمل غير مفهومة تماماً .. أخطاء إملائية في كلمات سهلة جداً مش مصطلحات .. خط غير مقروء .. ده كله في ورقة امتحان .. المفروض ان هدف الطالب انه يحل عشان ينجح .. أنه يحاول يوصل للمصحح انه فاهم .. ورقة الامتحان بيبقى فيها جزء من شخصيتك .. ماينفعش الدكتور يحس ان صاحب الورقة دي شخص مستهتر أو مستبيع او ماحاولش يبذل مجهود انه يحسن خطه حتى عشان اللي بيقرأ الإجابة مايتعميش..

والله كلامي دي خوفاً عليكم يا جماعة .. حاول تهتم بورقة إجابتك شوية .. نظام .. تحسين خط .. جمل مفهومة ومتصلة .. تكتب بالرصاص المقروء بدل ما تكتب بالجاف وتشطب كتير ..تكتب على السطور مش بينها .. آه والله فيه ناس بتكتب بين السطور وفيه بيكتب في الهامش اللي تحت مع ان فيه صفحات فاضية والله .. المطلوب قليل من النظام وبس لأن ده بيقول عنك كلام كتير ... طبعاً أنا بادور على المعلومات الصح في وسط كل العك ده زي اللي بيدور على إبرة في كوم قش عشان نفسي أنجح الناس كلها وياخدوا درجات وده بيتعبني جداً وبيخللي موضوع التصحيح ده حمل تقيل على قلبي .. وفي النهاية الأمر مش بايدي كلية لأن معايا دكاترة في المادة .. ممكن طالب يحل عندي كويس جداً والجزء التاني سيء جداً فيسقط أو العكس برضه ممكن يحصل وأعمال السنة كمان عليها عامل كبير
المهم نبعد عن الاستطراد على رأي أحمد خالد توفيق ونرجع لموضوع الإنجليزي .. مافيش مانع انك في الأجازة تاخد كورس مكثف في الإنجليزي عشان مستقبلك .. لأنك لما تتخرج المدير مش هيستحملك زي الدكاترة مابتستحمل .. كل ما بتعلي مستواك في اللغة الإنجليزية بتعلي مرتبك ومركزك في الشغل وبتفتح لنفسك مجالات عمل في شركات كبيرة ولو قررت تسافر بتشتغل في شركات multinational ويبقى مركزك محترم .. يعني الأمر مش رفاهية .. والله دي نصيحة مخلصة مني لأني بافرح ان طلابي يكونوا ناجحين وأشوف مستواهم بيعلى وبيطوروا نفسهم مش بس على المستوى العلمي ..لأ على كل المستويات
في أول كومنت بوست كتبته السنة اللي فاتت وأنا باصحح لأول دفعة وباتعرض لصدمات متتالية في ورق الامتحان .. نسأل الله الصبر
#من_واقع_التصحيح
#خد_كورس_انجليزي
#نظم_إجابتك
#انت_مهندس