تعليم جمع الأرقام بطريقة مناسبة للأطفال الحركيين

الفترة الأخيرة انشغلت شوية عن متابعة مذاكرة مصطفى ولما رجعت فوجئت انه عنده مشكلة في جمع الأرقام .. مش بيحاول يجمع من الأساس وبيحط اي نتيجة وخلاص
فبدأت أحاول أعرف المشكلة فين لقيت ان الطريقة اللي بيدرسوا بيها الجمع في المدرسة قد تكون غير مناسبة له ولغيره من الأطفال الحركيين
هاقولكم بيدرسوها ازاي : مثلاً عايزين نجمع 2+4
فالمفروض الطفل يعمل ايه Put the bigger in your mind and count the smaller on your hand
حاولت معاه انه يستوعب الطريقة دي ويطبقها لقيته مش قادر والمس في المدرسة كمان حاولت لكن مانجحناش
بعدين شفت في كتاب من اللي جبناهم في معرض الكتاب من المكتبة الانجليزية طريقة number line .. الصورة في أول تعليق.. فخطر في بالي ليه مانرسمش الخط ده على الأرض

ومصطفى ينط زي الضفدعة لغاية ما يوصل للناتج
الطفل الحركي بيفهم أحسن وهو بيتحرك
طبقنا في لحظتها وهو كان متحمس جداً .. أول وتاني مرة احتاج مساعدة وبعد كده بفضل الله برقت عيناه وقاللي أنا فهمت اللعبة وبدأ يطبق بثقة أكثر .. لقينا بالتجربة انه لما بيقف عند الرقم الكبير وينط بعدد نطات يساوي الرقم الصغير كده بيكون أسهل خاصة في جمع أرقام أحدهما أكبر من 5 زي 2+7 مثلاً
فرحت قوي انه فهم .. بس الموضوع محتاج تدريب عشان يتقن المهارة الجديدة دي ويطبقها على الورق
أكيد مش هينط في الفصل عشان يحل
جربوها مع أولادكم الحركيين
#طفلي_الحركي